ЭЛЕКТР ЭНЕРГИЯСИДАН НОҚОНУНИЙ ФОЙДАЛАНГАН ТАДБИРКОРГА ЖАЗО ҚЎЛЛАНИЛДИ

Бугун мамлакатимизда тадбиркорлар учун етарлича  шарт-шароитлар  яратилган. Албатта, бундан унумли фойдаланган тадбиркорлар самарали фаолият юритиб келмоқдалар. Лекин афсуски, орамизда яратилган имкониятлардан қонунда белгиланган тартибда эмас, балки ўзбошимчалик билан фойдаланишни афзал биладиган тадбиркорлар ҳам бор.  

Каттақўрғон шаҳридаги “Нурафшон” маҳалласида яшовчи С. С ни ана шундай шахслар сирасидан,- десак тўғри бўлди. Ўз хонадонида қандолатчилик маҳсулотларини ишлаб чиқаришни йўлга қўйган ушбу шахс қонун- қоидаларни четлаб ўтган ҳолда фаолиятини тадбиркор сифатида рўйхатдан ўтмаган ҳолда олиб борган. Қолаверса, у электр ҳисоблагичга ташқи таъсир кўрсатиб, электр энергиясини ўғирлик йўли билан ноқонуний фойдаланиб келган. Ўтказилган текширувларга кўра ушбу ҳаракати билан С.С  шаҳар Электр тармоқлари корхонасига 72,2 млн. сўмлик катта миқдорда зарар етказган.

Албатта, ҳар қандай қонунга хилоф бўлган қилмиш учун жавобгарлик муқаррар. Ушбу учар тадбиркорга ҳам қонун доирасида жавобгарлик белгиланиб, тегишли тартибда жазо чоралари тайинланди.

Бундан у тегишли хулоса чиқариб, келгусида фаолиятини қонун талаблари доирасида олиб боради, деган умиддамиз. 

Тадбиркорликни ривожлантириш, тадбиркорларнинг ишончли ҳуқуқий ҳимоясини таъминлаш, бу йўналишда қабул қилинган норматив-ҳуқуқий ҳужжатларнинг мазмун-моҳиятини тўғри англаган ҳолда фаолият юритган ҳар бир тадбиркор қонун ҳимоясида эканлигини  унутмаслиги лозим.

Ғ. ЯШУЗАКОВ,

Бош прокуратура ҳузуридаги иқтисодий

жиноятларга қарши курашиш департаменти 

Каттақўрон шаҳар бўлими бошлиғи.