СОЛИҚ ИДОРАСИ – ТАДБИРКОРНИНГ ИШОНЧЛИ ҲАМКОРИ ВА МАДАДКОРИ

Бугунги кунда мамлакатимизда амалга оширилаётган кенг кўламли ижтимоий-иқтисодий ислоҳотларнинг туб моҳияти ва бош мақсади «Инсон қадри учун» деган эзгу ғоя атрофида мужассамлашган. Ҳудудларимиз инфратузилмасини янгилаш, мактаб, боғча ва тиббиёт муассасаларини замон талаблари даражасига олиб чиқиш, маҳаллаларни обод қилиш — буларнинг барчаси бевосита маҳаллий бюджет тушумлари ва шаклланаётган барқарор солиқ базаси билан чамбарчас боғлиқдир.
Бугунги кунда фаолиятимизнинг бош мезони ва фалсафасини аниқ – солиқ идораси эндиликда  тадбиркорнинг энг яқин кўмакчиси, маслаҳатчиси ва бизнес кўмакчисига айланиши шарт.
Солиқ маъмуриятчилигида яширин иқтисодиётга қарши курашишнинг энг самарали ва адолатли йўли — жараёнларни тўлиқ рақамлаштиришдир. Бюрократик ғовларни бартараф этиш, коррупциянинг ҳар қандай кўринишига чек қўйиш ҳамда барча солиқ тўловчилар учун тенг ва адолатли рақобат муҳитини яратиш фаолиятимизнинг биринчи галдаги вазифасидир.
Бизнинг асосий бурчимиз фақатгина солиқларни ундиришдан иборат эмас. Аксинча, фаолиятини энди бошлаган ёки молиявий қийинчиликка дуч келган тадбиркорларга ҳуқуқий, ташкилий ва амалий ёрдам кўрсатиш, уларга қонунчиликда назарда тутилган имтиёз ва енгилликлардан тўғри фойдаланишни ўргатишдир. Тадбиркорнинг ривожланиши ва даромади ортиши — янги иш ўринлари ва ҳудуд иқтисодиётининг равнақи демакдир.
Солиқларни ўз вақтида ва тўлиқ тўлаш — бу шунчаки мажбурият эмас, балки ўз маҳалламиз, шаҳримиз ва фарзандларимиз келажагига киритилаётган тўғридан-тўғри сармоядир. Ҳар бир тўланган солиқ шаҳримиз йўлларини равон қилишга, ижтимоий муассасалар фаолиятини яхшилашга ва аҳоли турмуш даражасини оширишга хизмат қилади.
«Солиқ идораларининг эшиги ҳар бир тадбиркор ва фуқаро учун ҳамиша очиқ. Биз муаммоларни яширишга эмас, балки уларни очиқ мулоқот ва конструктив муҳокама орқали қонуний ҳал этишга тайёрмиз.»
Ишончим комилки, ўзаро ҳурмат, шаффофлик ва қонун устуворлигига таянган ҳолда биргаликда ҳудудимизнинг иқтисодий салоҳиятини янги босқичга олиб чиқамиз ва аҳолимиз фаровонлигини таъминлашда муносиб натижаларга эришамиз.
Шохиста Амонова,
Каттақўрғон шаҳар ДСИ  бошлиғи