PREZIDENT E’TIBORI — TARAQQIYOT VA ISHONCH MANBAI
Kattaqo‘rg‘on shahri azal-azaldan boy madaniy-ma’rifiy merosi, mehnatsevar aholisi hamda barqaror ijtimoiy-iqtisodiy rivoji bilan nafaqat viloyatda, balki respublika miqyosida o‘z o‘rniga ega. Ayniqsa, keyingi olti yil davomida amalga oshirilgan keng ko‘lamli bunyodkorlik ishlari shahar qiyofasini tubdan o‘zgartirdi.
Shubhasiz, ushbu ezgu ishlar zamirida Davlatimiz rahbarining doimiy e’tibori hamda shahar hokimi Gavhar Alimovaning fidokorona sa’y-harakatlari mujassam. Prezidentimizning Samarqand viloyatiga tashrifi esa Kattaqo‘rg‘on taraqqiyotida mutlaqo yangi bosqichni boshlab berdi. Xususan, 2025-yil 27-dekabrda imzolangan PQ–392-sonli qaror shahar tarixida yangi sahifa ochdi.
Qarorning ijtimoiy-iqtisodiy salmog‘i: Mazkur hujjat doirasida shaharga jami 88 milliard so‘m mablag‘ yo‘naltirilishi belgilangan. Bu raqamlar ortida shaharning ertangi qiyofasi va aholining farovon hayoti mujassamdir.
Hujjatga muvofiq quyidagi loyihalar amalga oshiriladi:
- Ta’lim: Kattaqo‘rg‘on pedagogika instituti binosini tubdan rekonstruksiya qilish.
- Infratuzilma: U. Barnoyev va Navoiy ko‘chalarini bog‘lovchi yirik ko‘prikni ta’mirlash orqali transport qatnovidagi muammolarga barham berish.
- Sport: Kelajak chempionlarini yetishtirish maqsadida shaharda Futbol akademiyasini tashkil etish.
- Turizm va ekologiya: «Yashil jamoat parki» hamda sohilbo‘yi dam olish maskanlarini barpo etish.
- Ijtimoiy himoya: Nogironlar reabilitatsiya markazining qurilishi.
— Prezidentimizning mazkur qarori biz uchun katta mas’uliyatdir. 88 milliard so‘m mablag‘ni maqsadli yo‘naltirib, xalqimiz turmushini yaxshilash — bosh maqsadimiz, — deydi shahar hokimi Gavhar Alimova.
Darhaqiqat, bugun Kattaqo‘rg‘on — uyg‘ongan shahar. PQ–392-sonli qaror uning nafaqat tashqi qiyofasini, balki insonlar taqdirini ham ijobiy tomonga o‘zgartirmoqda.
Jamshid NOSIROV, Xalq deputatlari shahar Kengashi deputati.