SAYYOR QABUL
Yurtimizda xotin-qizlarni qo‘llab-quvvatlash, ularning huquq va manfaatlarini himoya qilish, bandligini ta’minlash hamda jamiyat hayotidagi faolligini oshirish davlat siyosatining ustuvor yo‘nalishiga aylangan. Bu borada qabul qilinayotgan qonun va qarorlar joylarda izchil ijro etilmoqda. Ayniqsa, xotin-qizlar bilan ochiq muloqot o‘rnatish va ularni qiynayotgan masalalarni bevosita joyida o‘rganishda sayyor qabullar muhim ahamiyat kasb etmoqda.
Ana shunday navbatdagi sayyor qabul Kattaqo‘rg‘on shahrida bo‘lib o‘tdi. Unda viloyat hokimi o‘rinbosari — Oila va xotin-qizlar boshqarmasi boshlig‘i Zebo Saidova, shahar hokimi o‘rinbosarlari, shahar prokurori va boshqa mas’ul shaxslar ishtirok etdi.
Shahar Madaniyat saroyida tashkil etilgan qabulda 100 ga yaqin xotin-qizlar turli yo‘nalishdagi murojaatlari bilan qatnashdi. Murojaatlar orasida quyidagi masalalar ustuvor o‘rin egalladi:
- Bandlik: Ishga joylashish va doimiy daromad manbaiga ega bo‘lish;
- Ijtimoiy himoya: Moddiy yordam olish va imtiyozlardan foydalanish;
- Sog‘liqni saqlash: Davolanish va tibbiy xizmat muammolari;
- Huquqiy masalalar: Oilaviy munosabatlarda yuzaga kelayotgan muammolar.
Sayyor qabul davomida mutasaddilar tomonidan har bir murojaat atroflicha o‘rganildi. Ayrim masalalar joyidayoq ijobiy hal etildi. Qonunchilik doirasida qo‘shimcha o‘rganishni talab etadigan murojaatlar bo‘yicha fuqarolarga tegishli huquqiy tushuntirishlar berildi. Shuningdek, muayyan sohalarga taalluqli masalalar mas’ul tashkilot va idoralarga yo‘naltirilib, ularning ijrosi qat’iy nazoratga olindi.
Qabul jarayonida xotin-qizlar o‘zlarini qiynayotgan muammolarni ochiq bayon etish, taklif va mulohazalarini bildirish imkoniyatiga ega bo‘ldilar. Bu esa davlat organlari bilan aholi o‘rtasida o‘zaro ishonchni mustahkamlashga va muammolarga o‘z vaqtida yechim topishga xizmat qiladi.
Azizbek SHUKUROV.