ПОРА: ҚЎЧҚОР НОРҚОБИЛНИНГ АСАРИ КАТТАҚЎРҒОНДА САҲНАЛАШТИРИЛДИ
Каттақўрғон Драма театрида таниқли ўзбек адиби ва драматурги Қўчқор Норқобил қаламига мансуб бўлган «Пора” номли асар асосида саҳналаштирилган спектакль премьераси бўлиб ўтди. Унга шаҳар ҳокими Гавҳар Алимова, муассаса ва ташкилотларнинг раҳбарлари, нуронийлар, суд идоралари ва жамоатчилик вакиллари, ёшлар, каттақўрғонлик театр ихлосмандлари таклиф этилдилар. Шунингдек, премьерада асар муаллифи Қўчқор Норқобил иштирок этди.
Томошабнлар ҳукмига ҳавола этилган ушбу спектакль Қашқадарё вилояти мусиқали ва драма театри бош режиссёри Фарход Бойназаров томонидан саҳаналаштирилган бўлиб, премьерада янгича саҳна безаклари, спектаклнинг таъсирчанлигини оширган воқеликлар, ажойиб актёрлар жамоасининг маҳоратлари орқали коррупцияга муккасидан кетган инсоннинг қисмати тўлақонли очиб берилди.
Даврнинг долзарб мавзуси акс этган саҳна асарида жамиятимизнинг оғриқли нуқтаси, ривожланишимизга тўсиқ бўладиган иллат коррупциянинг бир кўриниши, инсониятнинг фақат осон йўл пора билан пул топишга ҳаётини бағишлаб инсонийликдан узоқлашгани, натижада оиладаги парокандалик, фарзандини йўқотиш, сўнгги пушаймонлик каби ҳаётий воқеликлар таъсирчан ифода этилган.
-Бир инсон ҳаётидаги фожеани кўрсатган замонавий драма билан танишгач айни ҳаётимизнинг оғриқли жиҳати, бутун инсоният ҳаётига тегишли хавотирли масала қаламга олинганлигини ҳис қилдик, – дейди театр директори Сунатилло Казаков. Собит образи орқали муаллиф ҳалолликнинг йўқотилиши қандай қилиб инсонни ичдан емиришини, ота эса виждон ва эътиқодининг сўнгги таянчи эканини кўрсата билган.
Дарҳақиқат, спектакль кишини чуқур ўйлашга, бахт ва омад, тинчлик ва ҳаловат фақат ҳалолликда эканини ҳис қис қилишга ундаши шубҳасиз.
Спектакль томошабинлар томонидан катта қизиқиш билан кутиб олинди. Премьера сўнггида сўз олган шаҳар ҳокими ўрнибосари Жасур Ғаниев спектаклда баён қилинган воқеалар бугун сиз-у-биз яшаб турган жамиятда юз бераётгани, бундай ҳолатларни олдини олишда жамоатчиликнинг роли катта эканлигини, жамиятнинг ҳар бир зиёли инсони бу каби иллатларни барҳам топишида ўз ҳиссасини қўшиши лозимлигини таъкидлади.
Премьерада иштирок этган асар муаллифи Қўчқор Норқобил спектакль ҳақида самимий фикрларини билдирган томошабинларга ўз миннатдорчилигини изҳор этди. Албатта томошабиннинг эътирофи ижодкорга катта илхом бағишлайди-деди у ўз сўзида. Шунингдек, асар муаллифи актёрларнинг маҳоратини алоҳида эътироф этди. Албатта, инсониятни ҳалол ва пок яшашга ундайдиган, тарбиявий аҳамиятга эга бўлган бу каби спектаклларнинг томошабинлар эътиборига ҳавола этилиши жамият ва давлат ривожига тўсиқ бўладиган иллатларга қарши курашиш, уларни олдини олишда муҳим аҳамият касб этади.
Ҳилола ЭРГАШЕВА.
