STRATEGIK HAMKORLIK: ISFT INSTITUTI VA KATTAQO‘RG‘ON SHAHAR HOKIMLIGI O‘RTASIDA MEMORANDUM IMZOLANDI

Oliy ta’lim va mahalliy ijro hokimiyati organlari o‘rtasidagi integratsiya — zamonaviy taraqqiyotning muhim omilidir. Shu maqsadda, ISFT instituti Samarqand filiali hamda Kattaqo‘rg‘on shahar hokimligi o‘rtasida o‘zaro hamkorlikni yangi bosqichga olib chiquvchi strategik Anglashuv memorandumi imzolandi. Mazkur kelishuv nazariy ta’lim va amaliyotni uyg‘unlashtirish orqali yuqori malakali kadrlar tayyorlashga xizmat qiladi.
Memorandum doirasida ISFT talabalari Kattaqo‘rg‘on shahar hokimligi tizimidagi boshqarma va tashkilotlarda ishlab chiqarish hamda malakaviy amaliyot o‘tash imkoniyatiga ega bo‘ldilar.
Bu jarayon yoshlarga:
O‘quv jarayonida olingan nazariy bilimlarni real boshqaruv tizimida sinab ko‘rish;
Soha mutaxassislaridan bevosita master-klasslar va professional maslahatlar olish;
Zamonaviy ish yuritish ko‘nikmalari va davlat boshqaruvi etikasi bilan tanishish imkonini beradi.

Hamkorlikning eng muhim jihatlaridan biri bu — bitiruvchilar bandligini ta’minlashdir. Kelishuvga ko‘ra, amaliyot davrida o‘zining intellektual salohiyati, mas’uliyati va tashabbuskorligi bilan ajralib turgan iqtidorli talabalar, kelgusida hokimlik tizimidagi bo‘sh (vakant) lavozimlarga ishga joylashish uchun tavsiya etiladi. Bu mexanizm mehnat bozoriga tayyor va raqobatbardosh kadrlar zaxirasini yetkazib berishda poydevor bo‘ladi.

ISFT instituti kelgusida ham ta’lim sifatini oshirish va talabalarning kasbiy mahoratini yuksaltirish maqsadida mahalliy va xalqaro tashkilotlar bilan uzviy hamkorlikni kengaytirishda davom etadi.