МУНОСАБАТ

Давлатимиз раҳбари томонидан белгилаб берилган коррупцияга қарши муросасиз курашнинг янги босқичи барча «масъул»ларни ҳушёрликка чорлаши шарт.
Бугун жамиятимизда энг катта иллат — коррупция ва мансабни суиистеъмол қилиш экани ҳеч кимга сир эмас.
Очиқлик йўқ жойда — иллат илдиз отади, жавобгарликдан қочиш кайфияти пайдо бўлади. Бироқ, энди бундай «ёпиқ эшиклар» ортида бекиниш, талон-торож қилиш даври тугади.
Яқинда Президентимиз томонидан илгари сурилган ташаббус — барча идораларда комплаенс ва коррупцияга қарши ички назоратга масъул ўринбосар лавозимининг жорий этилиши ҳамда Ҳисоб палатаси вакили фаолиятининг йўлга қўйилиши коррупцияга қарши ҳақиқий кураш эълон қилинганидан далолатдир.
Комплаенс — бу шунчаки лавозим эмас, бу таъсирчан назорат!
Янги тизимнинг асосий вазифаси — тизимдаги нопок шахсларни аниқлаш ва мансабни суиистеъмол қилишнинг олдини олишдир. Бу назорат вакиллари ички чириган тизимларни тозалаш учун масъул этиб белгиланди. Энг муҳими, Президент таъкидлаганидек: «Комплаенс хизматининг фаолиятига тўсқинлик қилганлар коррупцияга шерик деб баҳоланади ва жавобгарлик шунга мос ҳолда бўлади». Бу жуда жиддий огоҳлантириш ва кескин чекловдир!
Биз депутатлар сифатида идораларда бўлганимизда шунга гувоҳ бўляпмизки, профилактика ишлари кўпинча қуруқ ҳисоботлардан иборат бўлиб қолмоқда. Китоб, газета ва журналларни ўқишни четга суриб, фақат интернетдан маълумот олишга ўрганиб қолган айрим маънавий дунёси панжаралар билан ўралган масъуллар ҳақиқий профилактика нима эканини унутиб қўйган.
Маънавият ва ҳуқуқий тарбияни чуқур таҳлил ва мулоҳазадан олмаган раҳбар — эртага коррупция ботқоғига ботиши муқаррар.
Коррупцияга қарши курашиш фақатгина ҳуқуқ-тартибот идораларининг иши эмас. Бу — ҳар биримизнинг, айниқса, ҳар бир раҳбарнинг виждоний бурчидир. Ҳалоллик ва шаффофлик — 2026 йилнинг ва келгуси даврнинг бош талабидир. Бу талабга жавоб бермаганлар, қонун олдида албатта жавоб беради!
Жамшид НОСИРОВ,
Депутат, коррупцияга қарши курашиш ва ҳуқуқбузарликларни олдини олиш бўйича Доимий комиссия раиси.